ગઝલોનો ગુલદસ્તો
ડૉ. મહેશ રાવલ on January 26th 2012
ન ધારેલ સઘળું ય ધારીને જોયું......
બધું ફેરથી બહુ વિચારીને જોયું
ન ધારેલ સઘળું ય ધારીને જોયું
વિષય લાગણીનો હતો,એટલે તો
સ્મરણને નિતારી-નિતારીને જોયું !
હશે એની આડે ખુશી એમ સમજી
અમે દર્દને આવકારીને જોયું !
થતાં હોય કેમેય ખાતા જો સરભર
હતું જે જમા, એ ઉધારીને જોયું !
વળોટાય નહીં હદ કશી,કોઇ રીતે
નવેસર બધી હદ મઠારીને જોયું
ન બદલ્યું સ્વયં કંઇ,ન બદલી શકાયું
હતું યાદ એ પણ વિસારીને જોયું
સ્વભાવે જ ભજવ્યો હશે ભાવ,નહીંતર
મહેશતા ય છેલ્લે નકારીને જોયું !!!
ડૉ.મહેશ રાવલ
ડૉ. મહેશ રાવલ on January 21st 2012
લાગણીનો ઉતર-ચડ ગ્રાફ ....
જ્યાં લાગણીનો ગ્રાફ ઉતર-ચડ થયા કરે
સંબંધજન્ય ભાર,ઉતર-ચડ થયા કરે !
પરિણામશૂન્ય હોય ગરજવાનની દશા
ત્યાં મુખ્યતઃ લગાવ ઉતર-ચડ થયા કરે
નિઃશબ્દ હોય,તોય બની જાય બોલકું
તો મૌનનો પ્રભાવ ઉતર-ચડ થયા કરે
કારણ કદાચ હોય નજીવું,બની શકે
પણ અર્થનાં હિસાબ ઉતર-ચડ થયા કરે
ઈચ્છા અપૂર્ણ,સ્વપ્ન બની અવતરે સતત
‘ને સ્વપ્નનો પ્રવાહ ઉતર-ચડ થયા કરે
ઐશ્વર્ય જોખમાય અણીશુદ્ધ પ્રેમનું
તો ભીતરી તનાવ ઉતર-ચડ થયા કરે
તરકીબ કોઇ કામ નથી આવતી “મહેશ”
ક્રમબદ્ધ,ધૂપ-છાંવ ઉતર-ચડ થયા કરે !
છંદ વિધાન
ગાગાલગાલગાલ લગાગા લગા લગા
ડૉ.મહેશ રાવલ
ડૉ. મહેશ રાવલ on January 05th 2012
હતી ઓકાત જેવી જેમની, સહુ એ મુજબ વર્ત્યા....!
સફરમાં સાદ ‘ને પડઘા અસર કરતાં રહ્યાં છે બસ
પ્રસંગોપાત, ખુદ રસ્તા અસર કરતાં રહ્યાં છે બસ !
નહીંવત શક્યતા વચ્ચે ય માણી મુફલિસી મબલખ
વહ્યા એ આંસુઓ સઘળાં અસર કરતા રહ્યાં છે બસ !
નથી એનો નથી કંઇ રંજ, છે એનું નથી વળગણ
અભરખા તોય અધકચરા અસર કરતા રહ્યાં છે બસ
ચકાસી સ્વપ્નની નામાવલી તો ખ્યાલ આવ્યો કે
કદી આખા કદી અડધા અસર કરતા રહ્યાં છે બસ !
બદલવા નીકળ્યો’તો ભાગ્ય હું પુરુષાર્થના ટેકે
કદી છાંયા કદી તડકા અસર કરતા રહ્યાં છે બસ
નથી સ્થાપી શકાયા એ, અને જે થઇ ગયા સ્થાપિત
બધા સંબંધના ભરડા અસર કરતા રહ્યાં છે બસ !
હતી ઓકાત જેવી જેમની, સહુ એ મુજબ વર્ત્યા
કદી ફૂલો કદી પથરા અસર કરતા રહ્યાં છે બસ !
ડૉ.મહેશ રાવલ
ડૉ. મહેશ રાવલ on December 25th 2011
તડ પડે તો તૂટવું નક્કી જ છે...
મનવગર કંઇ માળવે પહોંચાય નહીં
હોય મન, તો કોઇને પૂછાય નહીં !
શું અસર કરશે ગળે ઉતર્યા પછી
એ વિચારે, ઝેર કંઇ પીવાય નહીં !
તડ પડે તો તૂટવું નક્કી જ છે
એ વિષયમાં કોઇથી કંઇ થાય નહીં
જે નથી એ પામવાની લાહ્યમાં
હોય, એના મૂલ્યને ભૂલાય નહીં
બુદ્ધિશાળી આપણે સાબિત થવા
અન્યને કહી મૂર્ખ,તરછોડાય નહીં !
રહી શકીએ નહીં કમલવત આપણે
એટલે કંઇ જળને અવખોડાય નહીં !
છે ઘણાં બીજા ય રસ્તાઓ ‘મહેશ’
ઘર બાળીને કંઇ તિરથ યોજાય નહીં !
ડૉ.મહેશ રાવલ
ડૉ. મહેશ રાવલ on December 03rd 2011
હલેસા,નાવ,શઢ ને જળ બધું બે-ખોફ ચાલે છે.....
વિષય વિસ્તાર ‘ને અટકળ બધું બે-ખોફ ચાલે છે
અહીં, સંબંધની પાછળ બધું બે-ખોફ ચાલે છે !
નદી બેબાકળી દરિયા સુધી પહોંચી, તો જોયું કે
હલેસા,નાવ,શઢ ને જળ બધું બે-ખોફ ચાલે છે
કરેલા કર્મનાં ફળ ભોગવે છે આમ તો સહુ,પણ
પ્રસંગો, આંસુભીની પળ બધું બે-ખોફ ચાલે છે !
કરે છે આંખ આડા કાન લોકો એમ સમજીને
કે અહીંયાં તો કપટ ને છળ બધું બે-ખોફ ચાલે છે !
ઘણીવેળા તરસતા હોય તરસ્યા, બુંદને ખાતર
અને વાતાવરણ,વાદળ બધું બે-ખોફ ચાલે છે
થયો છે એય અનુભવ જિંદગીની માર્ગલીલામાં
તરસ,રણ,ઝાંઝવા ખળખળ બધું બે-ખોફ ચાલે છે
નથી આસાન જીવનમાં ઠરીને ઠામ થઇજાવું
છતાં લાગ્યું, સબળ-નિર્બળ બધું બે-ખોફ ચાલે છે !
ડૉ.મહેશ રાવલ
ડૉ. મહેશ રાવલ on November 12th 2011
સંબંધના ઘેરાવ વચ્ચ્થી ટપકવાની ગઝલ....
સંબંધના ઘેરાવ વચ્ચેથી ટપકવાની ગઝલ
અંગતપણાની આડ વચ્ચેથી ટપકવાની ગઝલ
ખરડાય બરછટ સ્વાર્થથી નમણાંશ જ્યાં વહેવારની
ત્યાં અણકથિત અલગાવ વચ્ચેથી ટપકવાની ગઝલ
ડૂમો બની ઘૂંટાય ભીતર લાગણી સંજોગવશ
તો, પાપણોની ધાર વચ્ચેથી ટપકવાની ગઝલ
પામી શકે નહીં કંઇ સ્વયં, નહીં અન્યને આપી શકે
કાંડાવગરના હાથ વચ્ચેથી ટપકવાની ગઝલ
રહી જાય છાતી સાવ કોરી, ‘ને ઘવાતી પીઠ હો
એ ઓળખીતાં ઘાવ વચ્ચેથી ટપકવાની ગઝલ !
સાંપ્રત સમયની થાય જો સીધી અસર સગપણ ઉપર
તો શક્ય છે, બદલાવ વચ્ચેથી ટપકવાની ગઝલ
જ્યાં બોલવા જેવું કશું બાકી રહે નહીં, એ પળે
નિઃશબ્દતાનાં તાણ વચ્ચેથી ટપકવાની ગઝલ
ડૉ.મહેશ રાવલ
ડૉ. મહેશ રાવલ on October 21st 2011
જેમ, રસ્તા દૂર જઇ ફંટાય છે.....
ધારણા આગળ જતાં બદલાય છે
જેમ, રસ્તા દૂર જઇ ફંટાય છે
દૂરતા પણ જોઇએ થોડી-ઘણી
હાથવેંતે સાદ ક્યાં પડઘાય છે !
લાગણી જેને હશે જેના ઉપર
એ ગમે તે રૂપમાં દર્શાય છે
શક્ય છે એકાદ-બે અપવાદ હો
ઘર અધિકતર ઘર ફૂટ્યેથી જાય છે
કોઇને સંઘર્ષથી મતલબ નથી
મૂલ્ય તો પરિણામથી અંકાય છે !
જેમ જે સિંચાય, એમજ પાંગરે
પાત્રતા વહેવારથી પરખાય છે
છળ બધામાં હોય છે અહીંયાં “મહેશ “
થાય જે જાહેર,એ ચર્ચાય છે !
ડૉ.મહેશ રાવલ
ડૉ. મહેશ રાવલ on October 08th 2011
ક્યાંક રંગો ક્યાંક ભાતેભાત અફવા નીકળી ...!
એક ભીંતે સાંભળેલી વાત અફવા નીકળી
છેવટે,આખીનેઆખી જાત અફવા નીકળી
એ અલગ છે કે નિભાવ્યે જાય છે સંબંધ,પણ
ખ્યાલ સહુને હોય કઇ ઓકાત અફવા નીકળી !
જોખમી હોવા છતાં હર શક્યતાને અનુસર્યા
હર વળાંકે, શક્યતા સાક્ષાત અફવા નીકળી
ટાંકવા’તા આભલા આ જિંદગીનાં પોત પર
ક્યાંક રંગો ક્યાંક ભાતેભાત અફવા નીકળી !
બહુ રહ્યાં રત સગપણોમાં,વળગણોની હદ સુધી
આખરે સંબંધની વિસાત અફવા નીકળી
વેંત જે ઊંચા હતાં સરખામણીમાં અન્યથી
રંજ છે કે એમની રળિયાત અફવા નીકળી !
જેમ રાખે રામ, રે’વું આપણે કેવળ “મહેશ”
કૈંકની આ વિશ્વમાં મીરાત અફવા નીકળી !!!
ડૉ.મહેશ રાવલ
ડૉ. મહેશ રાવલ on September 23rd 2011
રંગો ઉઘડતાં જાય છે તમને મળ્યો છું ત્યારથી....
એકેક ક્ષણ જીવાય છે તમને મળ્યો છું ત્યારથી
આશા નવી બંધાય છે તમને મળ્યો છું ત્યારથી
બદલી રહ્યું છે અર્થ, સુક્કા સ્વપ્નઘરનું આંગણું
રંગો ઉઘડતાં જાય છે તમને મળ્યો છું ત્યારથી
શબ્દોવગર પણ થઇ રહી છે વાત ખુદથી હરપળે
બસ, મૌન રહી બોલાય છે તમને મળ્યો છું ત્યારથી !
લોકો દિલાસા દઇ ગયા સપનું ગણી ભૂલી જવા
પણ ક્યાં કશું ભૂલાય છે તમને મળ્યો છું ત્યારથી
આદત નથી પરિણામની પરવા ભર્યા તલસાટની
પણ આજ એવું થાય છે તમને મળ્યો છું ત્યારથી !
શું બહાર શું ભીતર બધું બસ,સાવ ખાલીખમ હતું
હોવાપણું છલકાય છે તમને મળ્યો છું ત્યારથી
સામે મળે તો ચાતરી લેતાં ગલી કહી બહાવરો
એ સહુ હવે વળ ખાય છે તમને મળ્યો છું ત્યારથી
ડૉ.મહેશ રાવલ
ડૉ. મહેશ રાવલ on September 16th 2011
સામસામા મોરચા......
જ્યાં સામસામા મોરચા મંડાય છે
સંબંધ, ખુદ સંબંધથી છેદાય છે
મુટ્ઠી બધાને રાખવી છે બંધ અહીં
પણ ઢાંકવાથી સત્ય ક્યાં ઢંકાય છે !
રસ્તો ખબર હોવા છતાં ભટક્યા કરે
ઉપલબ્ધ એને થાક કેવળ થાય છે
બેફામ જે પોરસાય છે ખોટું કરી
એકાંતમાં,એ જાતથી ગભરાય છે
ખુદ વાડ ગળતી હોય જેના ચીભડા
ક્યારેય એના ચોર ક્યાં પકડાય છે !
પોતે જ પોતાને નડે છે માણસો
‘ને આળ કાયમ અન્ય પર નંખાય છે !
થઇજાય છે જે અન્યખાતર પાળિયા
એના,પછી ઇતિહાસ આલેખાય છે
ડૉ.મહેશ રાવલ