RSS

Monthly Archives: May 2015

ઉઘડતાં નથી હવે !

માણસનાં હાવ-ભાવ ઉઘડતાં નથી હવે !

ગઇકાલ   જેમ,  આજ   ઉઘડતાં   નથી  હવે
માણસનાં   હાવ – ભાવ  ઉઘડતાં   નથી  હવે

‘આવો’ ન ‘આવજો’  ન ઉમળકો આતિથ્યનો
ખુલ્લા  મને,  જરાય   ઉઘડતાં   નથી   હવે !

છે    અંતરાય    કંઇક     બધાનાં    ઉઘાડમાં
ઉઘડી   જવા  છતાંય,   ઉઘડતાં  નથી   હવે

કારણ  ગમે  તે  હોય, હકીકત  એ  સ્પષ્ટ  છે
કે   લાગણી – લગાવ   ઉઘડતાં   નથી    હવે

જે  કંઇ  નિભાવ  છે  એ  ફકત  લોકલાજ છે
નહીંતર,  નિભાવણાં  ય  ઉઘાડતાં નથી  હવે !

અપવાદમાં   ખપે   એવા  થોડાક   ઘર   હશે
બાકી   એકેય,   ખાસ   ઉઘડતાં  નથી   હવે

ખાબોચિયા  તો  ઠીક  છે,  કાંઠાળ  જાત  છે
ઝરણાં  ય  ક્યાંક  ક્યાંક  ઉઘડતાં નથી  હવે !

© ડૉ.મહેશ રાવલ