RSS

Daily Archives: January 7, 2016

અવસર-અવસર લાગે છે !

 આખે-આખું હોવું  જાણે, અવસર-અવસર લાગે છે !

આખે-આખું હોવું જાણે, અવસર-અવસર લાગે છે !

 

ભીતરનાં  અજવાળે  સઘળું  ઝળહળ-ઝળહળ લાગે છે
આખે-આખું  હોવું  જાણે, અવસર-અવસર  લાગે  છે !

બહુ   વેઠી    મૂલવણી    અંદરખાને     સારા-નરસાની   
સમજાણું  ખુલ્લંખુલ્લા, તો  સમજણ-સમજણ લાગે છે !

વીત્યું  કે વિતાવ્યું  જીવતર, એ  બાબત  સહુની  અંગત
પણ લગભગ આંખોનાં ખૂણે, ગળતર-ગળતર લાગે છે !

ઊઠે પણ જાગે નહીં  એવા અધકચરા નહીં સમજે, પણ
જાગીને  જગ  જોયું  એને, સરભર-સરભર  લાગે  છે !

નિસ્બતનો  સાચો  મતલબ તો, નિસ્બત રાખે એ જાણે
મતલબથી નિસ્બત છે  એને  નડતર-નડતર  લાગે છે !

કેળવવી   પડશે   જાતે,  માંગી  મળશે  નહીં  મક્કમતા
નબળી માનસિક્તાને કાયમ  અવઢવ-અવઢવ લાગે છે !

થકવી  દેશે, સગપણનાં  ભારેખમ  ભારણનું  વળગણ
અંતે   કે’તાં  ફરશો, સાલ્લું   કળતર-કળતર  લાગે  છે !

 

  © ડૉ.મહેશ રાવલ

 
4 Comments

Posted by on January 7, 2016 in my gazal